පහත දැක්වෙන අවස්ථාවන්හිදී ජාතික කොඩිය ප්‍රදර්ශනය කළ යුතුය.
- ජාතික දිනය හා රජය විසින් ප්‍රකාශයට ත් කරනු ලබන ජාතික වශයෙන් වැදගත් එවැනි වෙනත් දිනයන්හිදී.
- සියලුම රාජ්‍ය උත්සවයන්හිදී.
එළිමහනකදී ජාතික කොඩිය එසැවීම
- ජාතික කොඩිය ප්‍රදර්ශනය කරනු ලබන කවර අවස්ථාවකද වුවද එයට ඉහළම ගෞරවනීය ස්ථානය දියයුතු අතර, එය පැහැදිළිව පෙනෙන ස්ථානයක සවිකර තැබිය යුතුය.
- විදේශීය රාජ්‍ය නායකයකු මෙරටට පැමිණි අවස්ථාවකදී ඔහුගේ ජාතික කොඩිය ප්‍රදර්ශනය කරනු ලබන විට ශ්‍රී ලංකා ජාතික කොඩිය ද ප්‍රදර්ශනය කළ යුතුය.
- සෑම අවස්ථාවකදීම ජාතික කොඩිය එසවීමේ කාර්යය ද එය පහත් කිරීමද සෙමින් හා ගෞරවාන්විතව කළ යුතුයි.
- ජාතික කොඩිය ඔසවා තැබිය යුත්තේ එහි සිරස් තීරු දෙක කොඩි ගස දෙසින් සිටිනා පරිදියි.
- සෑම උත්සවයකදීම ජාතික ධජයට ප්‍රමුඛතම ස්ථානයක් දියයුතුය. වෙනත් කිසිම කොඩියක් ඊට ඉහලින් ඔසවා නොතැබිය යුතුය. වෙනත් ජාතීන්ට අයත් කොඩි ඔසවා තබන්නේ නම් ඒවා ජාතික කොඩි ගසට සමාන උසන්ම සිටින සේ ඔසවා තැබිය යුතුවාත් හැර එම කොඩි ශ්‍රී ලංකා ජාතික කොඩියට වම් පසින් තිබිය යුතුය. කොඩි සියල්ල ප්‍රමාණයෙන් දළ වශයෙන් සමාන වියයුතු අතර ජාතික කොඩියට වඩා විශාල නොවිය යුතුයි. සාමකාමී සමයකදී එක් රටක ජාතික කොඩියක් වෙනත් රටක ජාතික කොඩියකට වඩා ඉහළින් ප්‍රදර්ශනය කිරීම ජාත්‍යන්තර ව්‍යවහාරයට අනුව තහනම් වේ.
- රාත්‍රී කා‍ලයකදී වුවත් ගොඩනැගිලිවල ජාතික කොඩිය ඔසවා තැබිය හැකිය. එහෙත් එසේ කළ යුත්තේ ඉතා විශේෂ අවස්ථාවන්හිදී පමණය. එබඳු සෑම අවස්ථාවකදීම කොඩිය ඔසවා තබන තාක්කල් එය විදුලි ධාරා ආලෝකයෙන් ආලෝකමත් කළ යුතුය.
- ආගමික කොඩි ප්‍රදර්ශනය කළ යුත්තේ ජාතික කොඩිය හා සමාන උසට සිටින පරිදිය.
- ප්‍රාදේශික කොඩි හෝ සමිති, පාසල්, සංගම් ආදියෙහි ධජ පතාක ආදිය ද සමග සාමූහික වශයෙන් ජාතික කොඩිය ද ඔසවන අවස්ථාවන්හිදී ජාතික කොඩිය සියල්ලටම මැදින් එහි ඉහළම ස්ථානයේ ඔසවා තැබිය යුතුය.
- පළාත්වල කොඩි, පාසල් ආදියෙහි ධජ පතාක සමග ජාතික කොඩිය ද කොඩි ගසක එකම යොතක එල්ලනු ලබන විට ජතික කොඩිය ඔසවා තැබිය යුත්තේ ඒ සියල්ලටම ඉහළින් සිටින පරිද්දෙනි.
- එකිනෙකට යාව පිහිටි කොඩි ගස් කිහිපයක කොඩි එල්ලනු ලබන විට මුලින්ම එසවිය යුත්තේත් අවසානයටම පහත් කළ යුත්තේත් ජාතික කොඩියයි.
- ගොඩනැගිල්ලක ජනෙල් පඩියකින් හෝ සඳළුතලයකින් හොෝඉදිරිපසින් පිටතට නෙරා සිටින සේ සවි කළ කොඩි ගසක ජාතික කොඩිය ඔසවතොත් එය අඩකුඹ කළ යුතු අවස්ථාවකදී හැර කොඩිය ඒ කණුවේ මුදුනෙන්ම එල්ලිය යුතුයි. තවද එම කණුව තිරස් අතට නොව අංශක 45ක කෝණයක් ඇති වන පරිදි සවි කළ යුතුවේ.
- වීදියක මැද ජාතික කොඩිය ප්‍රදර්ශනය කරනු ලබන අවස්ථාවන්හිදී සිංහයා නිසි පරිදි සෘජුව සිටින සේ තිරස් අතට කොඩිය දිග පැත්තෙන් එල්විය යුතුය.
- ජාතික ශෝක දිනයන්හිදී ජාතික කොඩිය අඩකුඹ කර තැබිය යුතුය. අඩකුඹ කිරීමේදී කළ යුත්තේ මුලින්ම කොඩිය මොහොතකට කොඩි ගසෙහි ඉහළට ඔසවා තබා යලි අඩකුඹ කර තැබෙන ස්ථානය දක්වා පහත් කිරීමය. එහෙත් දවස අවසානයේ ජාතික කොඩිය පහත් කිරීමට පෙර එය නැවතත් මුදුනටම එසවිය යුතුයි. කොඩිය අඩකුඹ කර තැබිය යුතු අවස්ථාවලදී කොඩි ගසේ මුදුනේ සිට මනින විට 1/3ක උස ප්‍රමාණයක් එහ පහත් කළ යුතුයි. ජාතික කොඩිය අඩකුඹ කළ යුත්තේ කිනම් අවස්ථාවන්හිදී ද යන්න රජය විසින් තීරණය කරනු ලබනු ඇත.
- ජාතික කොඩිය ඔසවනු ලබන විට කාලගුණ තත්ත්වය කුමක් වුවද ඉරිදා දින හා නිවාඩු දින ඇතුළුව සෑම දිනකම, හිරු උදාවේ සිට හිරු බැසීම දක්වා එය එකම ස්ථානයක ඔසවා තැබිය යුතුය.
- ජාතික කොඩිය කථික වේදිකාවක් මත ඔසවා තබනු ලබන අවස්ථාවන්හිදී කථිකයා සභාවට මුහුණදුන් විට ඔහුගේ දකුණින් තිබෙන පරිදි එය කොඩි ගසක මුදුනේ ඔසවා තැබිය යුතුය. එසේ නැතහොත් කථිකයාට පිටුපසින් වූ බිත්තියට හේත්තු වන සේ ඔහුට ඉහළින් ඔසවා තැබිය යුතුය.
No comments:
Post a Comment